الدرس لثانى فى المواريث

اذهب الى الأسفل

الدرس لثانى فى المواريث

مُساهمة  نور الهدى في الأحد يونيو 21, 2009 11:39 pm

( الدرس الثانى )
--------------------------------------------
( مقدمة )

نفتكر مع بعض بقى كده .. احنا قلنا ان اصحاب الفروض كام واحد .. برافو .. 12 .. وخدنا منهم اول اثنين وهم الزوج والزوجة .. النهاردة بقى هناخد ثالث حاجة من اصحاب الفروض .. ركزوا معايا بقى كده وطقطقوا ودانكم علشان درس النهاردة دسم شوية

بسم الله نبدا

ثالثا : البنت الصلبية :

واحد يقولى ايه يا عم الكلام المكعبر ده .. صلبية ايه وبتاع ايه .. بصوا يا جماعة .. البنت الصلبية هى بنت الميت مباشرة .. احنا قلنا اننا بننظر للورثة بحسب علاقتهم بالميت .. فده بقى تبقى بنت الميت مباشرة .. يعنى بنته اللى من صلبه مباشرة وعلشان كده سميت بالبنت الصلبية .. يعنى انتى يا دمعة تبقى بنت باباكى الصلبية .. ماشى كده .. ماشى


طيب ميراث البنت الصلبية بقى ؟





البنت الصلبية ده بترث بالفرض وليها 3 حالات :

الحالة الاولى :
=========

لو كانت واحدة فقط .. يعنى لا ليها اخت ولا ليها اخ يعصبها .. هنا فى الحالة ده بتاخد نصف التركة لوحدها ( 1\2 ف ) .

مثال : توفى عن : زوجة ، بنت ، اب

الحل : هنا الزوج طبعا هياخد الربع لوجود فرع وارث وهو البنت ، والبنت هتاخد 1\2 ف لانها واحدة .

-------------

الحالة الثانية :
=========

لو كانت بقى اكثر من واحدة .. يعنى مثلا لو كانوا بنتين او ثلاثة او عشرة حتى .. هنا كلهم بيشتركوا فى 2\3 ف .. يعنى كلهم بالبلدى كده يخمسوا فى الثلثين .

مثال : توفى عن : زوجة ، وثلاثة بنات ، واب

الحل : هنا الثلاثة بنات ياخدوا الثلثين فرضا ( 2\3 ) ف


---------------------------------------------
ملحوووووووووووووووووووووووظة هامة
---------------------------------------------

خدوا بالكم بقى من الحتة ده اوى .. الثلثين ده هو الحد الاقصى لارث البنات شرعا .. يعنى البنات ما ينفعش ياخدوا اكثر من الثلثين .. انشاء الله يكونوا مليون بنت حتى .. هما الثلثين ما فيش غيرهم .

بس ممكن ييجى واحد يختبرنى .. يقولى ايه يا ابنى البتنجان اللى انت بتقوله ده .. طيب ما ممكن واحد يموت ومالوش غير بنت واحدة ويبقى هى هتاخد التركة كلها ..

اقولها بس استنى يا معلم .. هى اصلا هتاخد 1\2 ف لانها واحدة .. طيب والنص الثانى .. النص التانى ده بقى حاجة هناخدها بعد كده اسمها الرد .. يبقى هى هتاخد النصف اصلا فرضا .. والنصف الثانى هتاخده ردا وليس فرضا

المهم انا عايزكوا تعرفوا دلوقتى ان الثلثين ده هو الحد الاقصى لارث البنات شرعا .

-----------------

الحالة الثالثة والاخيرة :
==============

لو كان بقى معها من يعصبها .. واحنا لو تفتكروا معايا كده قلنا ان البنت لا تعصب نفسها .. يبقى لازم مين يعصبها .. ذكر فى نفس درجتها وهو الابن الصلبى .. وفى الحلة ده البنت هتورث بالتعصيب ( ق.ع)

مثــال : توفى عن : زوجة ، وبنت ، وابن .

الحل : هنا الزوجة هتاخد الثمن بس لوجود الفرع الوارث ، اما البنت والبن فياخدوا ( ق.ع ) .. هياخدوا باقى التركة كلها تعصيبا ( للذكر مثل حظ الانثيين ).

-------------

بس .. ده كل حالات البن الصلبية .. صعبة ؟ .. نطبق بقى بالارقام علشان نفهم .

-------------

س1 . ( مثال على الحالة الاولى ) توفيت عن : بنت ، وزوج ، واخ لاب . وتركت 128 جرام ذهب .
ج 1 . الورثة : بنت ( 1\2 ف ) ، وزوج ( 1\4 ف ) واخ لاب ( ق . ع )

اصل المسالة : 4 ( اصغر رقم يقبل القسمة على كل المقامات اللى عندك )

السهام : ( اصل المسالة ÷ المقام × البسط ) للبنت 2 (4÷2×1) ، للزوج 1 ، للا لاب 1

قيمة السهم : 128 جراما ÷ 4 = 32 جراما

نصيب البنت = 2 × 32 = 64 جراما

نصيب الزوج = 1 × 32 = 32 جراما

نصيب الاخ لاب = 1 × 32 = 32 جراما

=====================================

س2 . ( مثال على الحالة الثانية ) ثلاثة بنات ، وابن ابن . وترك 162 فدانا .

ج1 . " ناخد بالنا هنا ان ابن الابن لا يعصب الثلاثة بنات لانه مش فى نفس درجتهم .. احنا قلنا لازم يكون ابن صلبى "

الورثة : ثلاث بنات (2\3 ف ) ، وابن الابن ( ق.ع )

اصل المسالة : 3

السهام : للبنات 2 ( اصل المسالة ÷ مقامهم × بسطهم ) ، ولابن الابن 1

بصوا بقى ............. دلوقتى احنا عندنا 3 بنات .. ونصيبهم سهمين .. يبقى احنا لو قسمنا السهمين ÷ ال 3 بنات لازم
هيطلعلنا كسر .. وحنا مش عايزين فى المسالة اى كسور .. نعمل ايه ؟



هنعمل حاجة اسمها تصحيح للمسالة .. يعنى ايه ؟ .. خدوا القانون ده :

لما تلاقى هيطلعلك كسر .. تعمل حاجة بسيطة خالص .. دلوقتى مين اللى عاملك المشكلة .. ال 3 بنات ..

تضرب ال 3 بنات × اصل المسالة = هيطلعلك اصل المسالة الجديد وتفكك من القديم خلاص

يعنى 3 ( اللى هى اصل المسالة ) × 3 ( اللى هما عدد رؤووس البنت اللى عاملين المشكلة ) = 9 ( اصل المسالة الجديد )


طيب افرض اللى كان عاملك المشكلة ابنين او جدين او اخين .. تضرب برده اللى عاملك المشكلة × اصل المسالة .

* طيب افرض بقى كان اللى عاملك المشكلة والكسر ( مشكلين ) .. يعنى مثلا ( ولد وبنتين ) ؟ .. اوع تقولى ولد وبنتين
يبقوا 3 وتروح ضارب فى اصل المسالة .. هتنضرب بالببش



لو عندك ولد مع بنات .. لازم تضرب الولد × 2 .. لان الولد بيورث اد البنت
مرتين .. كانك هتشيل الولد وتحط مكانه بنتين .. يبقى تضرب اصل المسالة × 4 مش 3 .. مفهوووومة ده .

( خدوا بالكم من الحتة ده قوى علشان طول السنة هتقابلنا مسائل محتاجة تصحيح )

نرجع بقى لمسالتنا .. هنا اصل المسالة الجديد = 3 ( اصل المسالة القديم ) × 3 ( عدد رؤوس البنات ) = 9

قيمة السهم = 192 ÷ 9 = 18 فدانا

نصيب الثلاث بنات = 6 × 18 = 108 فدان

نصيب ابن الابن = 3 × 18 = 54 فدان

===========================

س3 . ( مثال على الحالة الثالثة ) توفيت عن : زوج ، واب ، وبنت ، وابن . وتركت 765 جنيه ؟
ج 3 . الورثة : زوج ( 1\4 ف ) ، اب ( 1\6 ف ) ، ابن وبنت ( ق.ع )

اصل المسالة = 12

السهام : للزوج 3 ، وللاب 2 ، وللبنت والابنا معا 7

قيمة السهم = 576 ÷ 12 = 48 جنيها

نصيب الزوج = 3 × 48 = 144 جنيها

نصيب الاب = 2 × 48 = 96 جنيها

نصيب البنت والابن = 7 × 48 = 336 جنيها . تقسم بينهم للذكر مثل حظ الانثيين .
avatar
نور الهدى

عدد المساهمات : 20
سهم : 7013
تاريخ التسجيل : 13/06/2009

الرجوع الى أعلى الصفحة اذهب الى الأسفل

رد: الدرس لثانى فى المواريث

مُساهمة  el-amer في الإثنين يونيو 22, 2009 4:02 pm

مشكوره علي مجهودك
وانا هنزل جدول فيه كل اصحاب الفروض وحالتهم اتمني انه يعجبك
avatar
el-amer
مدير عام
مدير عام

عدد المساهمات : 84
سهم : 7198
تاريخ التسجيل : 14/06/2009
العمر : 31
الموقع : دمنهور

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى