شرح المواريث

نور الهدى الأحد يونيو 21, 2009 10:21 pm

الدرس الاول Very Happy

" اللهم انا نسالك فهم النبيين وحفظ المرسلين والملائكة المقربين .. اللهم اجعل السنتنا عامرة بذكرك وقلوبنا بخشيتك انك على كل شىء قدير "

بصوا بقى .. انا هشرح باللهجة العامية علشان نفهم احسن .. اوك .. توكلنا على الله

مادة المواريث ده تتعلق بتقسيم التركة على ورثة الميت .. وخدوا بالكم من الملاحظات ده :

* لما تجيلك مسالة ويقوللك توفى عن : زوجة و ابن وبنت مثلا .. تنظر لعلاقة هؤلاء الورثة للمتوفى وليس لعلاقتهم ببعضهم البعض .. يعنى ما يجيش واحد ذكى ويقولى طيب هما الابن والبنت اخوات .. مالناش دعوة .. احنا اللى يهمنا علاقتهم بالميت ..

* احنا هنبدا اولا بمعرفة انصبة الورثة وبعد كده ازاى نحل المسالة .. يعنى اهم حاجة تعرف الوريث ده ليه الربع ولا النصف ولا ايه بالضبط .. وفى ادلرس اللى بعده هنطبق بالارقام .. مفهوم

* فيه بعض المصطلحات ناخد بالنا منها .. يعنى مثلا ( ق . ع ) اختصار لكلمة ( الباقى تعصيبا ) وده بتكون للذكور فقط لان البنت لا تعصب نفسها .. ومعنى الباقى تعصيبا انه ياخد باقى التركة لوحد .. وخدوا بالكم ان البنت لا تعصب نفسها .. لكن الولد يعصب نفسه ويعصب اخته ............... وهكذا

* هناك فرق بين الولد والابن .. الولد ده ممكن يكون ابن او بنت .. يعنى لما اقوللك حسين جاله ولد .. يبقى قصدى انه جاله مولود ممكن يكون ذكر او انثى .. اما الابن ده معناه انه ذكر .. ابسطهالك .. لما القران الكريم يقول " ان لم يكن له ولد " يبقى قصدنا انه مالوش ولد ذكر كان او انثى .. اعتقد انها كده وصلت .

نــــــــــبــــــــــدا بـــــــــقــــــــى

اولا : هنبدا باصحاب الفروض ودول عددهم 12 .. هييجى واحد ولا واحدة تقولى يعنى ايه اصحاب الفروض ؟

اصحاب الفروض دول يعنى اول ناس بياخدوا حقهم من التركة وبيكون نصيبهم محدد .. بمعنى انهم بياخدوا حقهم اول حاجة مالهمشى فيه .. ودول 12 زى ما قلنا .. هناخد كل مرة 2 علشان نقدر نذاكرهم وبعد كده هنسخن انشاء الله

اول اتنين من اصحاب الفروض هنبدا بيهم .. الزوج والزوجة

الزوج :

ولما يقوللك الزوج يبقى بالطبع ان الميت زوجة .. والزوج ليه حالتين فى الميراث ..

1 ... لو ما كانشى الزوجة المتوفاة عندها ولد ( زى ما قلنا ولد يعنى ذكر او انثى ) .. ابسهالك .. يعنى اذا لم يكن للزوجة المتوفاة فرع وارث ذكرا كان او انثى .. يرث الزوج فى هذه الحالة ( النصف فرضا ) ونكتبها هكذا : ( 1\2 ف ) .

2 ... لو كان بقى للزوجة المتوفاة ده فرع وارث ذكرا كان او انثى .. يعنى ابن او بنت او ابن ابن او بنت ابن .. يرث الزوج فى هذه الحالة الربع فرضا ( 1\4 ف ) .

ملحوظة هامة : الفرع الوارث يعنى الابن او البنت او ابن الابن او ابن ابن الابن او بنت الابن او بنت ابن الابن .. اما ابن البنت وا ابن بنت الابن وهكذا فده لا يعتبر فرع وارث ويرث الزوج النصف زى ما هو

الاستنتاج العام : ان الزوج لا يحجب باى حال من الاحوال حجب حرمان ولكن يحجب حجب نقصان بس فى حالة وجود ايه ؟ .. فرع وارث .

التطبيق بقى واللى يهمنا بس ميراث الزوج :

* توفيت عن : زوج ، ابن ، بنت ابن

هنا الزوج يرث الربع .. ليه ؟ .. لوجود الفرع الوارث

-------------------------------------------

الزوجة :

بصوا بقى .. الزوجة زى الزوج بالضبط ليها حالتين برده بس بتاخد نصف الزوج .. بمعنى :

1 ... اذا لم يكن للزوج فرع وارث ، وعرفنا المقصود بالفرع الوارث ، ترث الزوجة ربع التركة .

2 ... اما بقى لو كان للزوج فرع وارث مذكر او مؤنث منها او من زوجة ثانية ، هنا ترث الزوجة ثمن التركة فقط .

*** ملحوظة هامة :

- لو تعددت الزوجات ، بمعهنى انه مثلا مات وترك اربع زوجات ، هنا كلهم يشتركوا فى الربع او الثمن .. يعنى ما يجييش حد ذكى ويدى لكل واحد الربع او كل واحدة الثمن .

التطبيق بقى وعايزين برده ميراث الزوجة بس :

* توفى عن : زوجة ، واب ، واخ شقيق

هنا الزوجة ترث 1\4 ف ( الربع فرضا ) ، لعدم وجود الفرع الوارث.

* توفى عن : زوجتان ، وابن ابن ، وام

هنا الزوجتان يشتركون فى ال 1\8 ف ( الثمن فرضا لوجود الفرع الوارث وهو ابن الابن )
الدرس الاول ( مكرر )

" تطبيقات على ميراث الزوج والزوجة "

بصوا بقى .. احنا طبعا عرفنا انصبة الزوج والزوجة فى الميراث .. عايزين ناخد بقى امثلة عملى بالارقام علشان نعرف الامتحان بييجى ازاى .. اوكى .. اوكى .. هيا بنا

ملاحظات هامة :

* اول خطوة فى المسالة نكتب الورثة .. يعنى لو فى حد محجوب نقول ان ده محجوب بسبب كذا .. ولو زوج مثلا ليه النصف نقول ان ده ليه النصف زى ما هنشوف كمان شوية .

* ثانى حاجة نشوف سهام الورثة .. يعنى ايه بقى سهام الورثة ؟ .. يعنى بالبلدى كده هنقسم التركة حتت متساوية .. ونعرف كل وريث ليه كام حتة وبعد كده نضرب عدد اسهم كل واحد فى قيمة السهم .. طبعا مش فاهمين حاجة .. هنوضح حالا

* اهم حاجة بقى .. نعرف ان :

- اصغر رقم يقبل القسمة على ال 2 و ال 3 هو ال 6 .
- اصغر رقم يقبل القسمة على ال 2 وال 4 هو 4 .
- اصغر رقم يقبل القسمة على ال 6 و ال 8 هو ال 24 .

وهــــــــــــــــــــــــــكــــــــــــــــــــذ ا ............................

نبدا بقى نطبق ونشوف هنحل ازاى

--------------------------------------------------------

س1 . توفيت عن : زوج ، وابن ، وبنت . وترك 820 جنيها .

الحل :

الخطوة الاولى : الورثة : زوج ، ابن وبنت

1\4 ف ، ق . ع

هنا اللى يهمنا الزوج .. ركزوا معايا فى الزوج لانه هيورث الربع فرضا .. لوجود الفرع الوارث .

كده خلصنا من الخطوة الاولى .

الخطوة الثانية : اصل المسالة = 4

اصل المسالة .. يعنى ايه اصل المسالة ؟ .. اصل المسالة يعنى اصغر رقم يقبل القسمة على كل المقامات اللى عندك .. وبما ان ده مسالة لسه بسيطة .. فما عندناش غير مقام واحد وهو ال ( 4 ) .. يبقى اصل المسالة = 4

الخطوة الثالثة : سهام الورثة : للزوج 1 ، وللابن والبنت 3

يعنى ايه الكلام ده ؟ .. احنا قلنا ان اصل المسالة ده كاننا قسمنا الورث ل 4 حتت او اسهم .. هنا الزوج ليه فى الاسهم ده قد ايه ؟
ليه ( 1 ) بس .. لانه واخد الربع .. يبقى 4 ( اللى هو اصل المسالة ) ÷ 4 ( اللى هو المقم بتاع الزوج ) × ا ( اللى هو بسط الزوج ) .. والاب والبنت هياخدوا الباقى تعصيبا يبقى ياخدوا ال ( 3 ) الباقيين من الاربعة . فهمتوا

الخطوة الرابعة : احنا قلنا اننا قسمنا الورث لاربع حتت .. عايزين نعرف بقى كل حتة او سهم = كام ؟

هنعمل ايه .. حاجة بسيطة خالص .. هنقسم الميراث كله على اصل المسالة

يبقى قيمة السهم = 820 ÷ 4 = 205 جنيه

يبقى كل سهم = 205 جنيه ..

نشوف بقى .. الزوج ليه كام سهم .. شطورة .. ليه سهم واحد

يبقى ميراث الزوج = 1 ( اللى هو عدد اسهم الزوج ) × 205 ( اللى هو قيمة السهم ) = 205

ميراث الابن والبنت = 3 ( اللى هو عدد اسهمهم ) × 205 ( اللى هو قيمة كل سهم برده ) = 615 جنيه

وكده خلصت المسالة .. صعبة ؟

-----------------------------------------------

ناخد بقى مسالة من غير شرح علشان نفهم اكثر

-----------------------------------------------

س2 . توفى عن : زوجة ، وابنين و ثلاثة بنات . وترك 80 فدانا .

( الحل )
--------

1. الورثة : زوجة ، ابنين وثلاثة بنات
1\8 فرضا
لوجود الفرع الوارث ، ق . ع

2. اصل المسالة : 8

3. السهام : للزوجة 1 ، وللابنين والثلاث بنات 7

4. قيمة السهم : 80 ÷ 8 = 10 افدنة . ( يبقى قيمة كل سهم = 10 افدنة )

5. نصيب الزوجة = 1 × 10 ( عدد اسهمها × قيمة السهم ) = 10 افدنة

6 . نصيب الابنين والثلاث بنات = 7 × 10 = 70 فدانا