الدرس الرابع والخامس والسادس

نور الهدى الثلاثاء يونيو 23, 2009 12:16 am

الدرس الرابع Very Happy

=========---------------------------------------
رقم ( 5 ) من اصحاب الفروض
--------------------------------
خامسا : ميراث الاب
===========
وطبعا المقصود هنا هو اب الميت مباشرة .. وده ليه 3 حالات فى الميراث .. تعالوا نشوفهم مع بعض :
الحالة الاولى : يرث السدس فرضا فقط لا غير ( 1\6 ف ) ، وده اذا كان للميت فرع وارث مذكر .. بكرر .. فرع وارث مذكر ..
يعنى الابن ، وابن الابن ، وابن ابن الابن .... وهكذا ... وانت نازل عالسودان .
مـــــثــــــــال : توفى عن ، ابن ابن ، اب . وترك 60 فدانا .
الـــــــحــــل : الورثة : الاب ( 1\6 ف ) ، ابن الابن ( ق.ع )
اصل المسالة = 6
سهام الورثة = للاب 1 ، ولابن الابن 5 .
قيمة السهم = 60 ÷ 6 = 10 فدان .
نصيب الاب = 1 × 10 = 10 افدنة .
نصيب الابن = 5 × 10 = 50 فدانا .
---------------------------------------------------------------
الحالة الثانية : يرث السدس فرضا + ق.ع .. وهنا بقى عكس الحلة اللى فوق .. وهى حالة وجود الفرع الوارث المؤنث ..
يعنى بنت الابن ، وبنت ابن الابن . .. فياخذ الاب فى هذه الحالة 1\6 فرضا ، وبعد ما اصحاب الفروض ياخدوا
فروضهم ، ياخد برضه الباقى ( ق.ع )
مــــــــــــثـال : توفى عن : بنت صلبية ، واب . وترك 30 جراما من الذهب .
الـــــــــحـــل : الورثة : للبنت ( 1\2 ف ) ، للاب ( 1\6 ف + ق.ع ) لوجود الفرع الوارث المؤنث .
اصل المسالة = 6
سهام الورثة = للبنت 3 ، للاب ( 1 + 2 )
قيمة السهم = 30 ÷ 6 = 5 جرامات
نصيب البنت = 3 × 5 = 15 جراما
نصيب الاب = 3 × 5 = 15 جراما
------------------------------------------------------------
الحالة الثالثة : وهى حالة عدم وجود فرع وارث مطلقا .. لا مذكر ولا مؤنث .. وهنا الاب هياخد ( ق.ع ) .
مـــــــثـــــــال : توفى عن : زوجة ، واب . وترك 40 فدانا ؟
الـــــــحــــــل : الزوجة ( 1\4 ف ) ، الاب ( ق.ع ) لعدم وجود فرع وارث مطلقا
اصل المسالة = 8
سهام الورثة = للزوجة 2 ، للاب 6 .
قيمة السهم = 40 ÷ 8 = 5 افدنة .
نصيب الزوجة = 2 × 5 = 10 افدنة .
نصيب الاب = 6 × 5 = 30 فدانا .
==================================
Neutral

الدرس الخامس Neutral

========----------------------------
ميراث الام
======
الام يا جماعة هى المقصود بيها ام الميت مباشرة .. وده ليها 3 حالات فى الميراث .
الحالة الاولى : ترث السدس فرضا اذا :
1 . لم يكن للميت فرع وارث مطلقا .. ولا مذكر ولا مؤنث .
2 . لم يكن للميت اثنان او اكثر من الاخوة والاخوات .. ايا كانوا بقى .. اخوة لام .. اخوة لاب .. اشقاء ..
من ده على ده .. المهم انهم يكونوا 2 او اكثر ، وخدوا بالكم انهم حتى لو محجوبين مالناش دعوة .
مـــــــثـــــال : توفى عن \ بنت ابن ، اب ، ام ، جد
الـــــــــحــل : الورثة : لبنت الابن ( 1\2 ف ) ، للام ( 1\6 ف ) لوجود الفرع الوارث ، للاب ( 1\6 ف + ق.ع ) ، الجد محجوب
بالاب .
مـــــــثــال اخر : توفى عن \ ام ، واب ، واخت شقيقة ، واخ لام ؟
الـــــــــــحـــل : للام ( 1\6 ف ) لوجود اثنان من اخوة الميت بالرغم من كونهم محجوبون بالاب ، الاب ( ق.ع ) ،
الاخ لام والاخت الشقيقة محجوبون بالاب
--------------------------------------------------------------
الحالة الثانية : وترث فيها الام الثلث فرضا ( 1\3 ف ) وذلك فى حالة عدم وجود فرع وارث مطلقا ، ولا اثنان او اكثر
من الاخوة والاخوات . يعنى عكس الحالة اللى فاتت .
مــــــــــثــــال : توفى عن : زوج ، وام ، واخت لام ؟
الـــــــــحــــل : للزوج ( 1\2 ف ) ، للام ( 1\3 ف ) ، للاخت لام ( 1\6 ف )
-----------------------------------------------------------
الحالة الثالثة : وهنا خدوا بالكم .. بترث ثلث الباقى من التركة بعد فرض احد الزوجين .. والمسالة ده ليها شكلين بس :
1 . توفى عن : زوجة ، وام ، واب .
2 . توفيت عن : زوج ، وام ، واب .
مالهاش غير الشكلين دول .. وده اسمها المسالة الغراوية .. وفيها بترث الام ثلث الباقى من التركة .
مــــــثـــال : توفى عن : زوجة ، وام ، واب ؟
الـــــــحـل : للزوجة ( 1\4 ف ) ، للام ( 1\3 الباقى ف ) ، للاب ( ق.ع )
----------------------------------------------------------
" كده يبقى خلصنا ميراث الام "
-----------------------------------------------------------
pale

الدرس السادس pale

----------------------------------------------------------------
ميراث الجد الصحيح
===========
مين هو الجد الصحيح يا جماعة ؟
الجد الصحيح هو الذى لا يفصل بينه وبين الميت انثى . يعنى زى اب الاب ، واب اب الاب ، ............. وهكذا
اما بقى اب الام ، واب ام الاب ......... الخ .. فده مش جد صحيح انما جد رحمى
--------
طيب الجد الصحيح ده بيرث ازاى ؟
ركزوا معايا بقى كده وطقطقوا ودانكم علشان درس النهاردة مليان حبتين
الجد الصحيح يا جماعة له حالتان فى الميراث :
===========
الحالة الاولى : يرث مثل الاب بالضبط . يعنى كانه اب . وده فى حالة اذا لم يكن للمتوفى اخوة اشقاء او لاب
استنى استنى استنى كده .. ايه الكلام الكبير ده ؟
لا كبير ولا حاجة . كل ما فى الامر انك لو ما لاقيتش للميت اخوة اشقاء ( يعنى مثلا زى ، اخ شقيق ، اخت شقيقة )
ولا كان للميت اخوة لاب ( يعنى مثلا زى ، اخ لاب او اخت لاب وهكذا ) . وانت مغمض تروح شايل الجد وتحاسبه كانه اب .
بس خد بالك انت وهو وهى .. الاخوات لام لاه .. انا قلت اخوة اشقاء او لاب . لان الاخوة الام هنعرف بعد كده انهم بيتحجبوا بالجد
طيب فكرونى بقى كده الاب كان بياخد ايه .. اه افتكرت .. شاطرة يا دودو .. الاب كان ليه 3 حالات :
1 . يرث 1\6 ف اذا كان للميت فرع وارث مذكر .
2 . يرث 1\6 + ق.ع ، اذا كان للميت فرع وارث مؤنث .
3 . يرث ق.ع ، اذا لم يكن للميت فرع وارث مطلقا .
مــــــثـــــــال : توفى عن : زوجة ، جد ، ابن .
الـــــــــحـــل : هنا الميت ليه اخوات اشقاء او لاب ؟ .. لا مالوش .. يبقى الجد يتعامل معاملة الاب
يبقى للزوجة 1\8 ، للجد 1\6 ( لانه كانه اب والاب بياخد السدس فى حالة وجود فرع وارث مذكر )
والابن هياخد ( ق.ع ) .
مــــــــثــــال : توفى عن : ام ، بنت ، جد
الــــــــحـــل : هنا للام 1\6 ، للبنت 1\2 ف ، للجد ( 1\6 + ق.ع ) .
مفهوووووووووووووووووووووووووم كده .. اعتقد ان الحالة الاولى ما فيهاش حاجة .
--------------------------------------------------------
الحالة الثانية : وده بقى عكس الحالة الاولى . يعنى لو فى بقى للميت اخوة اشقاء او لاب ..
واتفقنا ان الاخوة لام لاه لانهم بيحجبوا بالجد .
هنا بقى الجد هيرث ازاى ؟
بص يا سيدى : لو لاقيت فى المسالة جد ، ولاقيت للميت اخوة اشقاء او لاب .
فى الحالة ده هتحل المسالة مرتين .
- مرة تحلها وتدى الجد (1\6 ف ) .
- ومرة تانية تحلها وتخلى الجد يقاسم اخوة الميت فى باقى التركة بعد اصحاب الفروض . وخدوا بالكم .
انا قلت يقاسمه مش يعصبهم .. فرق كبير .. يعنى كلهم ياخدوا الباقى مش ( ق.ع )
" خلاص حليناها مرتين . نشوف بقى . والله لو كان السدس اللى خده الجد الاول احسن له من انه
يقاسم اخوة الميت . خلاص نديله السدس .
اما بقى لو كان السدس اقل من نصيبه لو قاسم اخوة الميت .. يبقى فكك من السدس وخليه يقاسمه احسن )
مــــــــــــــــــــــش فاهمين حاجة طبعا
مـــــــــــثــــال : توفى عن : زوجة ، ام ، جد ، اخوين شقيقين . وترك 1200 دولار .
الــــــــــــحــل : هنا تحل المسالة مرتان . مرة باعطاء الجد السدس فرضا . ومرة اخرى بمقاسمته للاخوة الاشقاء .
1 - الورثة : زوجة ( 1\4 ف ) ، ام ( 1\3 ف) ، جد ( 1\6 ف) ، اخوين ش ( ق.ع )
اصل المسالة = 12
سهام الورثة = للزوجة 3 ، للامة 4 ، للجد 2 ، للاخوين ش 3
قيمة السهم = 1200 ÷ 12 = 100 دولار
نصيب الزوجة = 3 × 100 = 300 دولارا
نصيب الام = 4 × 100 = 400 دولارا
نصيب الجد = 2 × 100 = 200 دولارا
نصيب الاخين ش = 3 × 100 = 300 دولارا
" خلصت المسالة كده ؟ .. لا لسه .. هنحلها تانى ............................. "
2 . الورثة : الزوجة ( 1\4 ف ) ، الام ( 1\3 ف ) ، الجد والاخوين الشقيقين ( الباقى مقاسمة بالتساوى )
اصل المسالة = 12
سهام الورثة = للزوجة 3 ، للام 4 ، للجد والاخوين ش ( 5 )
قيمة السهم = 1200 ÷ 12 = 100 دولارا
نصيب الزوجة = 3 × 100 = 300 دولارا
نصيب الام = 4 × 100 = 400 دولارا
نصيب الجد والاخوين الشقيقين = 5 × 100 = 500 دولارا . تقسم بينهم بالتساوى
فيكون لكل منهما . 166 دولار تقريبا . اذن نصيب الجد هنا قل من ان نعطيه السدس
" ييجى الجد يقوللك لا يا عم .. انا هاخد السدس احسن .. عايزين تضحكوا عليا "
يبقى هنا نصيب الجد 200 دولار اى السدس .. اما بقى لو كانت المقاسمة اكتر .. كان الجد ابن الايه ده يقوللك لا يا حبيبى .
انا اقاس الاخوة الاشقاء . عايزين تضحكوا عليا بالسدس .

**ميدو** الأربعاء يونيو 24, 2009 7:16 pm

شكرا ياحبيبه قلبي علي المجهود الرائع ده وربنا يخليكي لنا يارب
سؤال هي دي صورتك وانتي صغيره فعلا اكيد شكلك احلي من كده

الدرس الرابع والخامس والسادس

الدرس الرابع والخامس والسادس

رد: الدرس الرابع والخامس والسادس